Kattnakken triathlon

Fjorårets Kattnakken Triathlon vart ein braksuksess. Tradisjonen tru vert det sjølvsagt konkurranse i år også, og me går for ny deltakararrekord! Få med deg kjend og kjær og meld på lag eller deg sjølv til årets høgdepunkt. Årets store hending går av stabelen: 15. august 2010 Konkurransen er ikkje meint blodseriøs, men for enkelte kan den verte eit blodslit. Me vonar på deltakarrekord i år også. Salsargumenta våre er. For godt trena folk: Det er ein fin tur og i målområdet ventar brus og frukt. Som bonus kan de på veg ned att frå fjellet nyta smerten i andletet til alle dei utrena deltakarane som er på veg opp.

For vanleg trena folk: Ei variert og litt hard treningsøkt. Om det ikkje vert for mange godt trena deltakarar, så er det truleg brus og frukt til Dykk også. Ved å sjå dei godt trena deltakarane kan Dykk få motivasjon til å trene meir. Ved å sjå på dei utrena deltakarane kan Dykk trøyste Dykk med at det er folk som er verre stilt enn Dykk.

For utrena folk: Ein manndomsprøve og milepel i livet. Noko De kan fortelje borneborna Dykkar om, og dei vil nekte å tru det. Det er slike som Dykk som har bygd opp landet, som set i gong med noko De ikkje anar konsekvensane av, men gjennomfører det. Truleg er det heller ikkje noko igjen av brusen og frukta på toppen.

Hugs: Dersom du er for pysete til å  stilla på den individuelle tevlinga, kan du lokka med deg nokre pingler og stilla i lagkonkurransen.

NB: Dette er ikkje noko offisiell konkurranse og deltakinga er på eige ansvar!